Chinelas

…Katanghaliang tapat ng araw na iyon at nakasakay ako sa isang jeep papuntang SM Taytay, tagaktak na ako sa pawis sa sobrang init. Hindi naman sobrang sikip sa loob ng jeep ngunit napakainit. Maya maya, napansin ko ang isang mama na may dalang flier, bag na parang lagayan ng mga papeles at payong. Weird para sa akin ang itsura nya kasi nakajacket sya sa katanghaliang tapat, bukod dun nagssmile sya sakin.

…Papunta nga pala ako ng araw na yun sa SM Taytay dahil may bibilhin ako sa National Bookstore, malapit lapit na ang jeep na sinasakyan ko nang maya maya ay may sumakay na isang batang badjao na babae na talamak ngayon sa dakong Taytay. Nakatatlong batang badjao ata ang umakyat sa jeep na yun para mag abot ng mga sobre, at pangatlo ang batang babae na yun. Walang naglagay ng barya sa sobre nya. Ako din hindi ako naglagay, kung may baon sana akong biskwit, yun ang ibibigay ko sa kanya..kaso wala. Naupo ang batang babae sa jeep at hinihintay na tumigil ito, medyo malapit sa akin ang bata kaya naaamoy ko pa ang di kaaya aya niyang amoy. Nagulat na lang ako nang tabihan siya ng mamang weird at kausapin. “Neng, naniniwala ka ba kay Jesus?” narinig kong tanong nung mama. Umiling lang ang bata na hindi ko alam kung sinasabi ba niyang hindi o hindi niya kilala si Jesus. Maya maya narinig ko pa ang pagkausap ng mama, “Neng si Jesus ay Dios, mahal ka ni Jesus” Namangha at nagtaka ako sa paraan ng pagkausap ng mama sa batang badjao sabi pa niya “maya sama ka sa akin ha? bibili tayo ng tsinelas mo” Hindi ko alam kung saan sila pupunta para bumili, ngunit nung tumigil na ang jeep sa SM Taytay bumaba ang mama at ang badjao, bumaba din ako dahil dun naman talaga ako pupunta. Gusto ko sila sundan ngunit may dapat din ako gawin.

…Nung nabili ko na ang dapat kong bilhin sa National Bookstore, nakaramdam ako ng gutom at tumigil ako sa Mcdo para umorder ng pagkain. Nagulat ako at natuwa dahil nakita ko ulit ang weird na mama at ang batang badjao, nasa Mcdo na sila ngayon at oorder din ng pagkain. Nakita ko din na bago na ang tsinelas ng batang badjao, kulay pink na gusto ng karamihan ng mga batang babae. Naisip ko na buti at pinapasok sila ng gwardiya ng mall, naisip ko na baka may gawing masama yung mamang weird sa batang badjao, naisip ko na bakit kaya ginawa ng mama yun? Hindi naman mukhang mayaman o may kaya ang mama na yun ngunit nagawa niya pa ding magkawang gawa sa batang hindi naman niya kakilala o kaanu ano. Naisip ko na sana umuwing masaya at ligtas ang batang badjao. Naisip ko na sana ay mali ako sa panghuhusga sa itsura ng mama na yun.

…Nakaramdam ako ng hiya sa sarili ko habang tinitingnan ko ang mama at ang batang badjao. Tinitingnan din sila ng ibang mga tao na parang nagtataka din. Mahirap din ang mama na yun sa palagay ko ngunit nagawa pa niyang ibahagi sa batang yun ang mayroon siya. Nakakapangliit sa sarili ko, isa akong lingkod ng Dios at alagad ng simbahan ngunit hindi ko man lang magawa ang nagawa ng mama na yun. Wala akong nagawa kundi mag isip ng hindi maganda sa aking kapwa. Wala akong nagawa kundi manghusga. Kailan ko ba naibahagi nang ganun katapang si Kristo sa iba? Kailan ko ba isinantabi ang maaaring isipin ng ibang tao tungkol sa akin? Kailan ba ako nagpakaweird para kay Kristo kagaya ng mama na yun?